ನೆಟ್ಟಿಗರೆ ಹುಷಾರ್ ; ಸೈಬರ್ ಖದೀಮರ ಕಣ್ಣೀಗ ಗೂಗಲ್ ಮ್ಯಾಪ್ ಮೇಲೆ.... Google Map#Fraud....

Sun, Apr 28, 2019

BD1News ಕನ್ನಡ ವರದಿ: ನೆಟ್ಟಿಗರೆ ಹುಷಾರ್..! ಸೈಬರ್ ಖದೀಮರ ಕಣ್ಣೀಗ ಗೂಗಲ್ ಮ್ಯಾಪ್ ಮೇಲೂ ಬಿದ್ದಿದೆ. ಮ್ಯಾಪ್​ನಲ್ಲಿರುವ ಬ್ಯಾಂಕ್​ಗಳ ದೂರವಾಣಿ ಸಂಖ್ಯೆಗಳನ್ನೇ ಬದಲಿಸುವ ವಂಚಕರು, ನಂಬಿ ಕರೆ ಮಾಡುವ ಖಾತೆದಾರರಿಗೆ ಟೋಪಿ ಹಾಕಿರುವಂತಹ ಅನೇಕ ಪ್ರಕರಣಗಳು ಮಹಾರಾಷ್ಟ್ರದಲ್ಲಿ ಬೆಳಕಿಗೆ ಬಂದಿವೆ.

ಹೇಗೆ ವಂಚಿಸ್ತಾರೆ ಗೊತ್ತಾ..?

ಗೂಗಲ್ ಮ್ಯಾಪ್​ನಲ್ಲಿನ ಮಾಹಿತಿಗಳನ್ನು ವಿಕಿಪೀಡಿಯಾ ರೀತಿಯಲ್ಲೇ ಯಾರು ಬೇಕಾದರೂ ಬದಲಾಯಿಸಬಹುದಾಗಿದೆ. ಆದರೆ ನಕಲಿ ಗೂಗಲ್ ಖಾತೆ ಮೂಲಕ ಕೆಲ ವಂಚಕರು ಗೂಗಲ್ ಮ್ಯಾಪ್​ನಲ್ಲಿನ ಬ್ಯಾಂಕ್​ಗಳ ದೂರವಾಣಿ ಸಂಖ್ಯೆ ಬದಲಾಯಿಸಿ ತಮ್ಮ ಸಂಪರ್ಕ ಸಂಖ್ಯೆ ಸೇರಿಸುತ್ತಿದ್ದಾರೆ. ಇದರ ಅರಿವಿಲ್ಲದೆ ಸಾರ್ವಜನಿಕರು ಗೂಗಲ್​ನಲ್ಲಿ ಬ್ಯಾಂಕ್​ಗಳ ಮಾಹಿತಿ ಶೋಧಿಸಿದಾಗ ತಮಗೆ ಗೊತ್ತಿಲ್ಲದಂತೆಯೇ ವಂಚಕರ ಸಂಖ್ಯೆಗೆ ಕರೆ ಮಾಡುತ್ತಾರೆ. ಅಮಾಯಕರನ್ನು ತಕ್ಷಣ ಬಲೆಗೆ ಬೀಳಿಸುವ ವಂಚಕರು ಖಾತೆ, ಕ್ರೆಡಿಟ್, ಡೆಬಿಟ್ ಕಾರ್ಡ್​ಗಳ ಮಾಹಿತಿ ಪಡೆದು ಹಣ ಲಪಟಾಯಿಸುತ್ತಿದ್ದಾರೆ. ಮಹಾರಾಷ್ಟ್ರದಲ್ಲಿ ಇದೇ ರೀತಿ ಬ್ಯಾಂಕ್ ಆಫ್ ಇಂಡಿಯಾದ ಒಂದು ಶಾಖೆಯ ದೂರವಾಣಿ ಸಂಖ್ಯೆ ಬದಲಿಸಿ ಮೂವರು ಖಾತೆದಾರರಿಗೆ ವಂಚಿಸಿರುವ ಕುರಿತು ಇತ್ತೀಚೆಗಷ್ಟೇ ದೂರು ದಾಖಲಾಗಿದೆ. ಥಾಣೆ ಪೊಲೀಸರು ಈ ಕುರಿತು ತನಿಖೆ ಆರಂಭಿಸಿದ್ದು, ಬ್ಯಾಂಕ್ ಆಫ್ ಇಂಡಿಯಾದಿಂದ ಲಿಖಿತ ದೂರು ಪಡೆದುಕೊಂಡಿದ್ದಾರೆ.



ಗೂಗಲ್ ವಾದವೇನು..?

ಉತ್ತಮ ಸೇವೆ ನೀಡುವ ಉದ್ದೇಶದಿಂದ ದೂರವಾಣಿ ಸಂಖ್ಯೆ ಸೇರಿಸುವ ಅಥವಾ ಬದಲಾಯಿಸುವ ಅವಕಾಶ ನೀಡಿದ್ದೇವೆ. ಆದರೆ ಯಾವುದೇ ದುರ್ಬಳಕೆ ಆಗುತ್ತಿರುವುದು ಗಮನಕ್ಕೆ ಬಂದ ಕೂಡಲೇ ಸೂಕ್ತ ಕ್ರಮ* *ತೆಗೆದುಕೊಳ್ಳಲಾಗುತ್ತಿದೆ ಎಂದು ಗೂಗಲ್ ಇಂಡಿಯಾ ವಕ್ತಾರರು ತಿಳಿಸಿದ್ದಾರೆ.


ಎಚ್ಚರವಿರಲಿ,

ನೀವು ಕರೆ ಮಾಡಿದಾಗ ಯಾವುದೇ ಕಾರಣಕ್ಕೂ ಆನ್​ಲೈನ್ ಬ್ಯಾಂಕಿಂಗ್ ಯೂಸರ್​ನೇಮ್ ಪಾಸ್​ವರ್ಡ್, ಡೆಬಿಟ್ ಅಥವಾ ಕ್ರೆಡಿಟ್ ಕಾರ್ಡ್​ಗಳ ಸಂಖ್ಯೆ, ಹುಟ್ಟಿದ ದಿನಾಂಕ, ಸಿವಿವಿ ಸಂಖ್ಯೆ ನೀಡಬೇಡಿ.

ಗೂಗಲ್ ಸರ್ಚ್ ಎಂಜಿನ್​ನಲ್ಲಿ ತೋರಿಸುವ ದೂರವಾಣಿ ಸಂಖ್ಯೆಗೆ ನೇರವಾಗಿ ಕರೆಮಾಡಬೇಡಿ.

ಪಾಸ್​ಬುಕ್ ಅಥವಾ ಬ್ಯಾಂಕ್ ನೀಡುವ ಕಿಟ್​ನಲ್ಲಿ ನಮೂದಿಸಿರುವ ಅಧಿಕೃತ ದೂರವಾಣಿ ಸಂಖ್ಯೆ ಬಳಸಿ.

Like our news?